Digicast Negros

Sinovac vaccines man ang igahatag sa health workers sang probinsya

1,600 ka dose sang Sinovac vaccine ang gina paabot sini nga hapon ukon ayhan bwas nga adlaw para sa mga medical frontliners sang Negros Occidental.

Suno kay Dr Jane Juanico ang pamuno sang Infectious Diseases sang Department of Health Western Visayas apat ka mga ospital ang prayoridad sang bakuna kag ini ang nagalakip sang Teresita Lopez Jalandoni Provincial Hospital sa Silay, Valladolid District Hospital, Lorenzo Zayco District Hospital sa Kabankalan kag Cadiz Distict Hospital, pero suno kay Juanico depende sa kadamuon sang magapabakuna sarang man ma accomodate ang iban nga health workers sa iban nga ospital.

Para sa una nga dose ang lubos nga 1600 ka bakuna nga maga abot suno kay Juanico.

Suno kay Juanico, ang wala nagamit nga bakuna sang Bacolod amo ang paga gamiton para sa Negros Occidental kag ang kakulang ang pun-an sang supply gikan sa Iloilo.

Suno kay Atty Rayfrando Diaz, ang provincial administrator, i derecho ang bakuna sa Provincial Health Office nga storage kag idul-ong sa mga ospital base sa schedule kag mismo sa adlaw sang pag dul-ong ang pagdapat sang bakuna. May ceremonial vaccination sa Huwebes sa Silay Provincial Hospital kag madayon sa gihapon ang simulation sa banwa sang Murcia.

Kun pila gid ang boluntaryo nga magapabakuna sa health workers ang gina pat-od pa sa kumpleto nga listahan.

Exit mobile version
Skip to toolbar