Isa ka lalaki ang nagsulod sa simbahan sang Our Lady of Guadalupe sa Barangay Poblacion, banwa sang Valladolid, indi agud mangamuyo, kundi para mangawat, Martes sang hapon.
Makita sa kopya sang Closed-Circuit Television Camera footages ang pagbitbit sang lalaki sang isa ka Kevler Portable Bluetooth Speaker nga ginabulubanta nagabalor sang P10,000.
Ginagamit ang nasambit nga speaker sa mga area mass sang parokya.
Ginsiling ni Police Captain Bonifacio Galvez Jr., deputy chief sang Valladolid Police Station, nag-agi sa entrance sang simbahan ang suspek kag nagsulod sa kumbento kun sa diin niya ginkuha ang bluetooth speaker.
Naka-long sleeves, shorts, kalo, shades kag may dala nga helmet ang lalaki. Makita man sa CCTV nga nagpalagyo ini dala ang speaker, sakay sang motorsiklo.
Suno kay Galvez, padayon ang imbestigasyon sa suspek nga tubtob karon, wala pa sang identity.
Naga-ayo ang simbahan kag kapulisan sa kun sin-o man ang nakakilala sa lalaki ukon gintanyagan sang nasambit nga speaker nga magpakig-angut sa ila agud ma-recover ini.
“Gina-monitor naton subong kag gina-ayo sa pumuluyo nga if in case nga may ara sang may nagtanyag sa ila sang sini nga mga kasubong nga item, is kung pwede magpahibalo sila sa aton para at least ma follow-up naton”, suno kay Galvez.