SIM card registration period nga magalawig sa anum ka bulan ang ginsuguran na.
Ngalan, address, gender kag date of birth upod sa government issued ID ang kabahin sa mga requirement sa mga cellphone users para makaparehistro karon nga ginsuguran na ang pagpatuman sang SIM Card Registration Act. Ang laye ang ginpatuman agud mapunggan ang mga kaso sang cybercrime nalakip diri ang online scam, bank fraud, mobile phishing, text scam kag identity theft.
May 180 days ang gintalana para maka-rehistro ang mga SIM card users sa mga telecommunications company.
Sandig sa record sang National Telecommunications Commission nagalab-ot na sa 180 million ang SIM card users sa pungsod.
Gani naga-paandam man sa ila ang Department of Information and Communications Technology batuk sa mga fake registration links nga sarang pa maka-pangbiktima.
Bangud may mga lugar man nga mahinay ang internet signal, nagmandu na ang pamunuan sang Department of the Interior and Local Government sa mga LGU nga maghatag sang assistance sa mga SIM card users nga yara sa remote areas. Ang mga SIM card nga indi ma-rehistro ang iga-deactivate makaligad sang registration period. Sarang man mabilanggo sa sulod sang anum ka bulan tubtob sa duha ka tuig kag may multa nga indi magnubo sa P100, 000 tubtob P300,000 ang mga nagahatag sang peke nga information kag document sa ila pagpa-rehistro sang SIM card.