Sa video nga ginapasa pasahan karon sa social media, makit-an ang tuman nga pila sagwa sang isa ka establisimiento commercial sa siudad sang Himamaylan.
Nagdagsa ang mga tawo para sa 12.12 sale nga ginsakdag sang Sabado nga adlaw sang amo nga retail store sa nagkalain lain nga mga branches sini.
Mabatian ang tingug nga naga abiso sa mga naga pila nga mag isol. Naka mask man pero wala na nasunod pa ang physical distancing.
Bangud sang sitwasyon suno kay Himamaylan Mayor Raymund Tongson ginpauntat sang adlaw na ang amo nga sale.
May pulis kag task force ang siudad nga nagbantay kag apesar sang sulit sulit nga pahanumdom wala napunggan ang mga tawo rason nga sa pagsapol sa tagdumalahan sang amo nga retail store nagdesisyon nga untaton na lamang.
Suno sa alkalde plastado man kuntani ang plano sang tagdumalahan para sa amo nga sale.
“On the day sang sale, ara gid ya tanan na men in uniform, ara ang city legal, traffic enforcer even bantay bayan. Galing kay as usual, indi man namon, the most is we can appeal bala and then implement the protocols. pero indi man kami maka, physical sa ila kay basi ma misinterpret man nila ang mga naga enforce sina. Kabudlay gid sa tawo kay indi man mamati because siguro sang excitement man sa sale sang Prince, that’s why ang task force naglab-ot na lang gid sa decision to coordinate with the management then it was decided by the management nga i-close na lang gid ang Prince sa late morning of that day,” suno sa alkalde.
Sa siudad sang Sagay, tuman man ang pila sa 12.12 sale nga ginsakdag sang amo nga retail store. Sa post ni Manang Sagaynon makit-an man ang pagdagsa sang mga pumuluyo.
Suno kay Atty Ryan Bonghanoy, ang action officer sang Sagay Inter-Agency Task Force nagmando ang alkalde sang pag cancel sang permit para sa amo nga sale kag ginpasira ang amo nga establisimiento sa amo nga adlaw.
Mahimo suno kay Bonghanoy nagdudom ang mga tawo nga tuman sila makabarato bangud sa gintanyag nga sale amo nga nagdagsa sila.
“May numbering sila (retail store) limited to 100 lang. Na mishandle guro nila ang sitwasyon, abi nila naka intindi ang tanan. All of a sudden puno from the entrance going to the old church up to the terminal. Nagpila ang tawo because of the notion nga 12 pesos lang ang bili sang balaklon…wala gid sila naka start sang sale,” suno kay Bonghanoy.
Damlag pa suno sa Department of Trade and Industry ang mga hilikuton nga gina lantaw makabulig sa pagpabalik sang ekonomiya ang ginahaylo basta ang pagsulundan sa minimum health protocols ang mapatuman.
Suno sa pamuno sang DTI sa probinsya nga si Rachel Nufable ang natungdan nga sale ang may nagakaigo nga permiso. Ila pa sa karon lantawon kun ano ang natabo.