Mga safety check sticker mangin balasehan sa pagpat-od nga insured ang naga-byahe nga traditional jeepney sa Bacolod.
May masobra na sa 400 ka mga traditional jeepney, kadam-an diri mga nagpa-consolidate sa idalom sang Asenso Bacolod Cooperative ang nagpabutang sang safety check stickers gikan sa Bacolod Traffic and Transportation Management Department. Ginsiling ni BTAO Deputy Jose Antonio Robello nga ang initiative ang mangin balasehan sang Bacolod LGU agud mapat-ud nga lehitimo kag insured ang nagabyahe nga mga salakyan. Sa sini nga pamaagi ila luyag nga mausisa ang kadamuon sang nabilin nga mga traditional jeepney sa siudad.
Ginsiling ni Jun Asis nga chairman sang Asenso Bacolod Cooperative nga indi magnubo sa 1,200 ang ila mga miyembro nga nagpaidalom na sa consolidation. Ginapaabot nila nga samtang gina-proseso ang ila pagsulod sa modernization program matigayon gihapon nga matagaan sang extension ang pag-byahe sang ila mga traditional jeepney units sa pihak sang ginatuman nga public utility vehicle modernization program.