Nag-viral ang video nga gin-upload sa social media sang motorcycle rider kung diin makita ang paglalis niya kag sang iya amay sa traffic enforcer nga nagpara sa iya tungod wala siya naka-helmet sa banwa sang Calatrava, Negros Occidental sadtong Oktubre 20.
Sa video mabatian nga nagapamangkot ang rider kung nga-a sa kadamo sang nagalinabay nga naka-motor kag wala sang helmet, sila lang ang ginparahan. Naga-rason ang rider nga wala man sang layi ukon ordinansa nga na-aprobahan nga dapat dakpon ang wala nagasuksok sang helmet sa Calatrava.
Matapos ginpapundo, gintawgan sang rider ang iya amay kag ila pareho nga ginlalis samtang gina-videohan ang traffic enforcer. May tion pa nga nagataas ang tingog sang amay sa traffic enforcer.
Suno sa traffic enforcer, naghatag lang siya sang warning nga sa sunod sila ang magapanakop na sang wala naga-helmet.
Gina-imbestigaran karon sang Land Transportation Office-Negros Island Region ang natabo kag sila ang nagpapanaog na sang show cause order batok sa rider.
Suno sa LTO, wala nakasuksok sang standard protective motorcycle helmet samtang nagasakay sa Suzuki nga motor ang rider, nga isa ka pagsupak sa Republic Act 10054 okon ang Motorcycle Helmet Act of 2009.
Magluwas sa traffic violation, sarang man nga makasuhan sang disobedience ukon resistance to an agent of a person in authority ang nasambit nga rider.
Samtang, ginklaro ni Calatrava Mayor Marilyn Era nga may yara sila sang existing Municipal Ordinance nga gin-amiyendahan sadtong February 2026 nga dapat magsuksok sang crash helmet ang mga naka-motor nga nagabiyahe sa banwa.
Sumugod Pebrero, amat-amat na nga ginapabalo sa publiko ang angot sa nasambit nga ordinansa.
Suno kay Mayor Era, tungod sa natabo, nagapakita lang nga kung sila ang mangin kampante, mas mangin pabaya ang publiko sa layi trapiko sang banwa, kaangay sang rider nga ginkwestyon pa ang katungdanan sang empleyado ka banwa nga nagahimo lang sang iya obra.
Tubtob Nobyembre 30 na lang ang paghatag sang warning sa mga motorista kag sa December 1, istrikto na nga igapatuman sang Calatrava ang “No Helmet No Travel” policy.*
[sibwp_form id=1]