Nagapati si Bacolod City Councilor Homer Bais nga isa na ka “red flag” ang pagka delay sang pagpatukod sang Legislative Building sa Bacolod City Government Center nga kabahin pa sa 4.1 billion pesos nga loan sang siudad sa Development Bank of the Philippines sa idalum sang administrasyon ni anay Mayor Alfredo Abelardo Benitez.
Ini ang suno sa iya nagduso sa iya nga magpasar sang isa ka resolusyon sa Sangguniang Panlungsod nga mag request sa Commission on Audit nga magpatuman sang special fraud audit sa 765 million pesos nga proyekto.
Martes nga adlaw, gintalakay ini sa 69th regular session sang SP, kag wala ini gin aprubahan sang mayorya.
Dugang ni Bais ang pagpasa sang amo nga resolusyon ang kabahin lamang sang pag pangayo sang transparency sang mga proyekto sa idalum sang loan nga nangin kontrobersyal na sa siudad sa karun.
Sandig sa proposed resolution ni Bais, as of October 22, yara palang sa 51.19 percent ang completion rate sang Legislative Building.
Ginsugudan sang Legacy Construction Corporation kag MKU Construction and Supply ang amo nga proyekto sang December 2023 kag natalana kuntani ini nga matapos sang June 2025.
Apisar sa pag ka delay sang proyekto, suno kay Bais ang pagbayad sang siudad sa contractors kag ang mga progress billing ang nagapadayon sa gihapon.
Suno naman sa SP, sarang man maka request si Bais sa COA bisan indi na ini maglabay sa SP, apang suno kay Bais, indi niya gusto nga maakusaran nga political grandstanding ang iya ginahimo.
[sibwp_form id=1]