Mga rescuer sang Barangay Sum-ag sa viral nga video bangud sa gina alegar sala nga pagkarga sang pasyente ang ipatawag sang CDRRMO para sa isa ka refresher nga training.
Nakuha ang ini nga video sang Domingo nga adlaw sa Araneta Street sa Barangay Sum-Ag, Bacolod City kon sa diin nagbunguanay ang duha ka salakyan kag ang isa ka motorsiklo.
Patay sa insidente si alyas Joshua nga nagapadulong sa Norte nga bahin sang dalan matapos nga mag overtake ini kag nakabunggo sa isa ka salakyan nga naga padulong sa sur.
Bangud sa kakusog sang impact, nagtabog ang biktima kag nakabunggo pa gid sa isa ka salakyan nga gintunaan sang iya kamatayon.
Bangud sa gina-alegar nga pag mishandle sang pasyente, natalana nga ipatawag sang Bacolod City Disaster Risk Reduction and Management Office ang mga rescuer nga makita sa video.
Ginsiling ni Dr. Anna Maria Laarni Pornan, pamuno sang CDRRMO, nga sa iya paglantaw, may mga tikang gid man nga wala nahimo ang mga rescuers samtang naga responde sa amo nga insidente.
Dugang naman ni Bacolod City Mayor Greg Gasataya, sa Martes, tanan nga mga barangay nga may ara sang ambulansya ang ipatawag man sang siudad agud mahibaluan ang ikasarang sang drivers kag rescuers.
Matapos sini, hatagan sang CDRRMO sang refresher training ang rescuers sa Barangay Sum ag.
Sa rekord sang CDRRMO, pulo palang ka mga barangay ang may kaugalingon nga ambulansya nga nag gikan man sa siudad.*
[sibwp_form id=1]