Digicast Negros

Rep Yulo magaduso sang pagtukod sang Binadlan Tourism Zone

Igaduso ni 5th District Representative Dino Yulo ang pagdeklarar sang Binadlan sa Barangay Biao sa banwa sang Binalbagan bilang isa ka tourism area.

Sa amo nga barangay makit-an ang matahum nga Bambi ukon Binadlan Falls kag malapit man diri ang Hermit Mountain nga popular sa karon sa mga turista ilabi na kun weekend.

Sa iya nga Facebook post, ginpahayag ni Yulo nga sa liwat pagbukas sang Kongreso, maga-file siya sang hagna nga nagatukod sang Binadlan Tourism Zone.

Magluwas sini, maga pain man sang pondo ang talatapan ni Yulo para sa pagpa-semento sang dalan halin sa Hermit Mountain padulong sa Bambi Falls para mangin mahapos para sa mga turista ang pagbiyahe padulong diri.

Sa pagpadulong ni Yulo sa lugar iya nakita nga puno ang magagmay nga mga kalan-an malapit sa Hermit Mountain, nga nagapakita lamang sang benepisyo sang turismo sa lokal nga ekonomiya kag palangabuhian sang mga pumuluyo didto sa lugar.

Luyag niya nga ma preserve ang lugar kag mabuligan para malikawan ang pagkaguba sang mga matahum nga talan-awon sa palibot.

Exit mobile version
Skip to toolbar