Naglupok ang isa sa tatlo ka mga granada nga ginhaboy sa rent-a-car shop sa Purok Villa, Bangga Salgado sa Barangay Tangub, Bacolod City, kaina pasado las dos sang kaagahon.
Ginsiling ni Police Captain Greeky Cayao, hepe sang Police Station 8 nga under investigation pa ang insidente kag ila pa ginahibalo ang posible motibo sa paghaboy sang mga granada.
Maswerte naman nga wala sang may nasamaran sa insidente.
Natabuan nga nagakatulog ang mag-asawa nga tag-iya, upod ang ila mga kabataan kag pakaisa sang ginhaboy sang mga suspek ang mga granada sa garahe.
Bangud sang paglupok sang granada, na-damage ang naka-park nga mga salakyan.
Suno kay Cayao, nakuhaan sang CCTV camera ang mga suspek.
Narekober sa lugar ang duha ka wala naglupok nga mga granada kag karon yara sa paghinakop sang Bacolod City Explosives and Canine Unit (CECU).
Padayon karon ang pag-identify sa mga suspek nga nagasakay sa motorsiklo.