Liwat nga ginpahayag sang Bacolod Gugma Foundation Incorporated nga apisar mag-ulan man ukon mag-init sa tion sang highlights sang ika 47 nga MassKara Festival magapadayon sa gihapon sa dalan sang SM City Bacolod ang Arena Dance Competition.
Ginsiling ni Atty. Hannah Lea Tañoso-Dela Torre, Corporate Secretary kag Legal Affairs head sang Gugma, nga wala na sang alternative nga venue para sa arena dance.
Suno sa iya, ila naman gin assess sang maayo ang venue kag nagapati sila nga indi na magbaha sa area kun mag ulan bangud pagabuksan man ang diversion channel sang Reclamation Area.
Masobra sa 20 ka mga bleachers ang ipahamtang sa kilid sang dalan para sa Arena Dance sa Oktubre 17 kag 18. Tagsa ka mga bleachers ang may sitting capacity nga 250.
Sa kabug-usan may estimated nga 5,000 sitting capacity ang bag-o nga venue.
May igabutang man nga mga LED Screens para sa live viewing sang arena dance sa plaza kag BCGC.
Sumugud Oktubre 1, yara na sa full alert status ang Bacolod City Police Office para sa pagbantay sang seguridad sa mga festival sites.
Nag request man ang kapulisan sang dugang nga pwersa gikan sa Police Regional Office Negros Island Region para sa MassKara
Nag-request naman ang BCPO sa LGU sang pagpatuman sang gun ban sa bilog nga schedule sang festival, samtang posible man mapatuman amg signal jamming sa highlights.
[sibwp_form id=1]