Ang pag doble sang quarterly allowance sang mga senior citizen kag persons with disability gikan sa 300 pesos padulong sa 600 pesos ang kabahin sa napatuman ni Silay City Mayor Joedith Gallego sa iya first 100 days in office. Suno kay Gallego ini kasunod sang pag approve man sang Sangguniang Panlungsod.
May 17,800 ka senior citizen sa Silay City kag 3,000 naman ang PWD.
Aksyon agad ang programa nga luyag ipatuman sang alkalde.
Nalakip diri amo ang pagpahamtang sang Mayor’s Office sa idalum ukon sa ground floor agudto mas mahapos para sa mga senior citizen kag PWD nga may kinahanglan nga magpalapit man sa iya.
Mas ginpadasig suno sa iya ang releasing sang medical kag burial assistance. 1,796 ang naka avail sang medical assistance kag 315 naman ka pamilya sang mga nagtaliwan ang nahatagan sang burial assitance.
Edukasyon
Ang Iskolar ng bayan nga sadto 64 karon nangin 410 na. May yara man sang nagapaidalom sa skills training sa STA.
Naghatag man sang transportation ang siudad sa mga manunudlo nga na assign sa mga malagyo nga lugar.
Peace and order
Ginakalipay naman sang alkalde ang accomplishment sang Silay Police Station bahin sa anti-drug campaign. Tuyo karon nila nga malambot ang drug-free Silay.
Infrastructure
Ang mga ginareklamo nga dalan labi na sa mga malagyo nga barangay suno iya ang nakaayo sa idalom sang City Engineer’s Office.
Nag angkon man sang puluy-an ang 112 beneficiaries matapos mahatagan sang award sa Yolanda housing.
Naka patigayon man sang Job Fair ang siudad kun sa diin 34 ka kompanya ang nakigbahin. Sa 1,159 ka applicants 124 ang na-hire on the spot.
Future projects
Pila sa mga tinutuyo ni Gallego amo ang makapatindog sang bag-o nga city hall sa Hda. Maquina. Dugang pa diri ang pag patindog sang City College nga naga balor sang 300 million pesos, sa duta sang mga pamilya Jalandoni kag Valderma. Kabahin man sa projects ni Gallego ang pag patindog sang 3-storey Public Market 1 kag pag develop sang Market 2.
Ginbatun naman sang siudad ang donation ni Norman Jison para patindugan sang Sports Complex.
Ipatuman man ang Rehabilitation sang Guinsang-an Bridge.
Si Gallego ang nag-deliver sang iya nga 100 days accomplishment report sa Silay City Public Plaza nga gintambungan sang mga local officials kasubong man empleyado.
Kag sa tinutuyo nga mapa ambit ang nagakaigo sa serbisyo gina dumilian man sang alkalde ang suplado kag suplada sa pag atubang kag pag serbisyo sa pumuluyo.