Grave misconduct ang kaso administratibo samtang paglapas sang Republic Act 3019, ukon Anti-graft and Corrupt Practices Act naman ang criminal case nga ginpasaka sang siudad sang Bacolod batuk kay Barangay 16 Punong Barangay Jason Ligaya.
Ini matapos nga wala nagsunod ang punong Barangay nga ipabilin ang katinlo kag kahilway sang sidewalk sa Palanca road, sakop sang iya nga Barangay.
Ginsiling ni City Legal Officer Atty. Karol Joseph Chiu, nga matapos nila na clear ang dalan, nagbinalik naman ang iligal structure, ilabi na ang isa ka vendo carwash nga yara na mismo sa dalan.
Sandig pa sa ila imbestigasyon, si Ligaya mismo ang tag-iya sang amo nga vendo car wash, rason nga ila na ginpasaka ang kaso sa Office of the Ombudsman.
Si Ligaya ang nangin pinakauna nga punong barangay sa Bacolod nga nakasuhan bangud sa amo nga rason sa idalum sang administrasyon ni Mayor Greg Gasataya.
Dugang ni Chiu, ang ini nga hitabo ang isa ka mensahe para sa tanan nga mga punong barangay sa siudad nga sila mismo ang kinahanglan nga mag disipilina sang ila pumuluyo.
Sa isa ka interview sa radio gina kwestyon sang punong barangay kun ngaa siya lang ang gina pa initan sang siudad kag kadamo man sang obstruction sa dalan.*
[sibwp_form id=1]