Padayon pa tubtob sa karon ang maid-id nga imbestigasyon sang Cadiz PNP sa natabo nga pagtiro kag pagkamatay sang pulis nga na assign sa Sagay City Police Station nga si Police Staff Sargeant Bernie Sales.
Suno abi kay Cadiz PNP chief Police Major Robert Mansueto, indi pa klaro kun ano ang natabo nga nagresulta sa paglupok sang armas sang pulis.
Base sa ila initial nga investigation, ululupod pa inom sanday Sales kag ang suspek nga babayi nga iya asset upod sang duha pa gid ka lalaki.
Sang papuli na kun tani si Sales suno kay Mansueto, ginpunggan siya sang babayi para mag inom pa.
Base sa ila mga upod naga sunluganay man lang ang duha suno sa ila pero sa wala madugay gulpi na lang nag lupok ang armas ni Sales.
Makita man sa CCTV suno kay Mansueto nga ang duha lang amo ang yara sa salakyan ugaling indi makita kun ano gid ang natabo.
Dugang pa ni Mansueto posible bangud sang pag agaway sang armas amo nga natiruhan si Sales kag ini nag resulta sa iya kamatayon.
Detained karon sa Cadiz PNP ang babayi kag kaso nga homicide ang ipasaka sang PNP batuk sa iya.