National Irrigation Administrator ang nag panawagan sang kooperasyon sang mga mangunguma sa tinutuyo nga malab-ot ang food security para sa pungsod. Lubos nga suporta para sa mangunnguma ginapasalig.
Nangin dinapit nga bisita sa Irrigators’ Association Congress sa Bacolod si NIA Administrator Benny Antiporda kun sa diin iya gin pasalig ang innovation gikan sa bahin sang ila nga talatapan para ma serbisyuhan ang mga mangunguma.
Nalakip na diri ang mas madasig nga serbisyo amo man mga proyekto. Pagpanghangkat niya sa mga mangunguma amo nga dapat mapangapinan ang tubig; ang ano man nga mga guba sa irigasyon ang dapat nga gilayon ma report.
Sa NIA, ang palay ang prayoridad sa karon sa tinutuyo nga matigayon sa idalom sang Marcos Administration ang rice export, nagasunod naman ang tubo kag high value crops suno kay Antiporda.
Suno kay Acting Governor Jeffrey Ferrer ginapaabot ang pagpatuman sang programa nga maga pasiguro sang efficiency kag productivity sang mga mangunguma.
Gin pasalig ni Ferrer nga ang gobeyrno probinsyal yara para sa pagsuporta sang programa nga maga pasanyog pa gid sa mga farmers.
Naglagda naman sang Pledge of Commitment ang NIA kag ang Negros Occidental Federation of Irrigator’s Association nga gina tapuan sang 160 ka Irrigators’ Association: 16,154 farmer-members nga naga pananum sa 19,661.27 ka ektariya sang irrigated agricultural land sa probinsya.
Sila ang nagsaad sang ila nga suporta sa Administrator sang NIA angut sa katumanan sang tinutuyo sang administrasyon ni Presidente Ferdinand Marcos, Jr., sa idalom sang flagship program nga Masagana 150 kag Masagana 200 para malab-ot ang rice sufficiency sa pungsod.
Nalakip na diri ang lubos nila nga suporta sa mga programa sang Department of Agriculture paagi sa partnership sini isa NIA.
Ining gina baton naman sang NIA kag nagasaad ang ahensya sang effective kag sustainable irrigation services para sa mangunguma.