Indi lang presyo sang naga panguna nga balaklon kasubong sang bugas, tubig kag iban pa ang nagsalaka epekto sang bagyo odette kabangdanan nga ginmandu man ni Presidente Rodrigo Duterte ang mandatory price freeze sa sulod sang isa ka tuig.
Sa idalom sang state of calamity gin lakip sa price freeze ang presyo sang generators, solar panel kag bisan pa mga oxygen tanks.
Ini bangud indi lang doble kundi triple ang ginsaka sa presyo sang ini nga mga produkto makaligad nga nawad-an sang supply sang kuryente ang probinsya ilabi na ang bahin sang southern Negros nga tubtob karon wala pa mabalik ang supply sang kuryente.
Suno kay executive assistant George Zulueta, acting chairperson sang City Price Monitoring Council, pwede na maka pasaka sang reklamu ang mga konsomidor sa mga nagapamentaha nga negosyante paagi sa mga natungdan nga ahensya.
Bangud man sang kakulang sang personnel ang department of trade and industry ang nagahaylo sa local price monitoring council sang tagsa ka local government unit nga magpatuman sang inspection kag mapasiguro ang pagpatuman sang price freeze.
Ang mga baligyaan nga madakpan nga wala sapayan nga nagasupak sang mandatory price freeze ang sarang ma multahan, ma revoke ang permit kag mapasira sang siudad.
Sa madasun nga tuig ginapaabot man sang council ang posible pagsaka sang presyo sang poultry kag meat products epekto sang halit sang Bagyo Odette sa agriculture industry.