Naga pabilin sa 12 to 14 pesos ang baklanay sang kilo sang humay.
Ini suno kay Pedro Limpangog ang presidente sang Federation of Irrigators Association Central Negros – Bago River Irrigation System ukon FIACN-BRIS base sa ila nga monitoring.
Paathag niya wala pa man nila mabatyagan ang epekto sang ginpatuman nga importation ban.
Indi man nila mapat-od ang kadamuon sang stocks subong, pero iya ginsiling nga sang ani sang bulan sang Mayo, may mga nabilin pa nga stocks bangud wala man sadto gin ubos pa gwa sang mga mangunguma kay tuman sila ka pierde sa presyuhanay sa imported nga bugas.
Nagalaum sila sa gihapon nga tigayon sila makabawi.
Kun mag saka man sa P17 ang presyo sang kilo sang humay maka bawi-bawi ang mangunguma.
Kun mag P20 kuntani ang baklanay maka ginansya sila.
Indi man tanan maka baligya sa National Food Authority suno sa iya nga naga bakal sang humay sa P23 kada kilo.
May mga requirements ang NFA kag wala labot diri mas luyag sang mga mangunguma nga madasig ang baklanay para man masabat ang ila nga adlaw- adlaw nga kinahanglanon suno kay Limpangog.
Isa man sa gina lauman nila nga mahatagan atensyon amo nga tigayon maka access kag mapaayo ang post harvest facilities.
Nahuman na bag-o lamang ang ani sa north district suno sa iya kag padayon ang ani sa south district.