Matapos ang sinakuay sang MassKara Festival, ginahandaan na man sa karon sang Bacolod City LGU ang mga designated areas para sa mga vendors sumugod sa Oktubre 29 tubtob Nobyembre 2 para sa Undas 2026.
Ginsiling ni Bacolod City Administrator Atty. Mark Steven Mayo nga wala man sang ipatuman nga full road closure para sa tigkalalag, magluwas na lamang sa Burgos Cemetery kun sa diin half road closure ang ipatuman humalin sa Police Station 4 padulong sa corner Lopez Jaena.
Ang area ang pagagamiton bilang designated nga lugar para sa mga nagabaligya sang bulak kag mga kandila.
Lakip pa gid sa mga designated vending areas amo ang Gonzaga kag San Juan Streets sa Public Plaza, sa gwa kag sulod sang patyo sang Handumanan kag Granada, kag Mabini-Hernaez Streets sa Libertad Market.
Ginklaro man ni Mayo, nga indi pagustohanay ang pag pwesto sang mga vendors bangud hugot man ini nga pagabantayan sang City Legal Office.
Antes makaplastar ang vendors, kinahanglan anay nga makasecure sila sang special permit gikan sa LGU.
Sumugod sini nga semana, ginmanduan na ang mga katapo sang General Services Office nga mag-amat amat na paninlo sa mga public cemeteries sa siudad agud mangin matawhay ang pagbisita sang mga himata sa ila nga minatay.
[sibwp_form id=1]