Nagpasiguro si Bacolod City Police Office Director Colonel Eugene Rebadomia nga ila ginatinguhaan nga ma-locate ang mga persona sa likod sang mga dummy accounts nga nagapalapta sang pagpamahog sa mga eskwelahan.
Ini matapos ang isa pagid ka pag pamahog nga naglapta sa social media Lunes sang gab-i kag naghatag sang kahadlok sa mga estudyante kag ginikanan sang Sum-ag National High School.
Matapos nga naglapta ang post, gilayon man ini nga gin delete sang amo nga account. Apang Martes sang aga, liwat ini nga nagpost kag suno sa iya lahog lang niya ang una nga post.
Wala anay sang face to face classes ang SNHS sini nga adlaw.
Sa karun, ginalantaw sang kapulisan nga posible isa lang ka tawo ukon yara sa parehas nga grupo ang nagpost man sang una nga pagpamahog sa Ramon Torres National High School sa Bago City.
Suno kay Rebadomia, nagpakig-angut na sila sa Regional Anti-Cybercrime Unit agud mapadasig ang pagtumod sang mga persona sa likod sang mga pagpamahog.
Ini ang ika pito nga pagpamahog sa mga eskwelahan sa Bacolod sini nga tuig suno kay Rebadomia.
May nabaton man nga pagpamahog pati ang Bacolod Taytung High School Martes nga adlaw suno sa pila ka mga ginikanan.
Sarang nga mapasakaan sang kaso ang kutob sa matumod sang kapulisan nga nagapalapta sang pagpamahog.
“Hopefully ma-identify naton. Kwaon ko nalang ni ang chance nga makapanawagan sa mga ginikanan nga tani hambalan naton ang mga kabataan naton nga indi mag-kwan (engage) sa mga post nga mga maka-cause sang disturbance or threat kay indi gid siya maayo”, suno kay Rebadomia.
[sibwp_form id=1]