Padayon sa karon ang pag follow up sang Police Station 7 may angut sa natabo nga robbery hold-up kahapon sang kaagahon sa isa ka restaurant sa Barangay Alijis sa Bacolod.
Ang salakyan nga isa sa kinawat ang na kita na gilayon kahapon sa dalan Gonzaga pero ang motorsiklo sang isa ka naga trabaho sa food delivery services company ang wala pa na recover sang kapulisan.
Wala pa man sila sang identity sang tatlo ka mga suspek nga nag pa kuno kuno customer sang sila ang nag sulod sa restaurant la una sang kaagahon kahapon kag nag deklarar sang hold-up.
Suno pa kay Police Captain Elmer Bonilla, hepe sang Police Station 7, posible mga bag uhanon pa lang ang mga kawatan ukon nag trip trip lang bangud sa wala pa nila kabisado ang ila ginahimo.
Magluwas sa salakyan kag motor, nakuha man sang mga suspek ang mga cellphone sang mga biktima kag relo.
Gina tinguhaan pa karon sang PNP nga maka kuha sang kopya sang iban pa nga mga CCTV ilabi na sa dalan Gonzaga agud makabulig sa pag kilala sa mga suspek.
“Kay ang mood nila bala sang kwan daw, medyo kwan pa ni ining indi professional bala, ining kwan pa lang ni siya, wala pa nila na master ila trabaho,” suno kay Bonilla.