PNP handa nga atubangon ang reklamo sang katapo sang traditional transport group sa nagluntad nga tension sa dalan Lacson sa Bacolod.
Nanindugan si Police Major Eugene Tolentino, station commander sang Police Station 2 nga wala sang may ginlapas nga laye ang kapulisan sa pag-aresto sang anum ka mga katapo sang traditional transport group sa nagluntad nga tensyon sa dalan Lacson sang Miyerkules sang aga.
Magluwas nga wala sang permit ang pag-rally sang grupo sa atubang sang L’Fisher Hotel, naapektuhan ang negosyo sang malapit nga commercial establishment kag lakat sang trapiko.
Gani ginkinahanglan sang kapulisan nga ma-disperse ang rally resulta nga naglab-ot ini sa pag-water cannon sa mga naga-protesta.
Naglab-ot sa punto nga pila sa mga nag-rally ang nanghaboy sang bato resulta nga duha sa mga pulis ang nagkalasamaran.
Naka-gwa na sanday Rudy Catedral nga pamuno sang BACOD kag KNETCO president Lilian Sembrano pati ang apat pa nila ka mga kaupdanan nga nagpanguna sa rally.
Ginkondenar nila ang ginhimo sa ila sang kapulisan kag karon nagaplano sila nga magpasaka sang counter charges.
Gindihon naman nila karon ang natalana nga nationwide transport strike sa madasun semana. Handa naman ang Bacolod LGU kag Bacolod City Police Office sa ila mangin tikang.
Ginpahayag ni City Legal Officer Romeo Carlos Ting, Jr., nga bisan sang ginapatigayon nga negosasyon sang LGU upod sa mga traditional jeepney organization ginasige lang gihapon sang grupo ang ila mga tikang.