May anum pa ka mga pamilya nga nagpadulong sa Silay PNP sang nagligad nga semana para mag usisa sa tatlo ka mga bangkay nga nasapwan nga ginhulog sa idalom sang Oyut Bridge sa Sitio Lantawan Barangay Guimbalaon sa siudad sang Silay sang Disyembre 31.
Suno kay Police Lieutenant Judeses Catalogo, spokesperson sang Negros Occidental PNP, wala sa ila nag-claim bangud indi na makilal-an ang mga bangkay nga ginsulod sa sako kag yara na sa advanced state of decomposition.
Duha sa mga bangkay ang mga tul-an na. Nagapati si Catalogo nga posible mga pangayaw ang mga biktima nga ginwigit lang sang wala pa makilal-an nga mga persona.
Sa pagpang usisa sang Silay City Police, Disyembre 26 sang mabugtawan sang isa ka residente sa lugar ang pagdulog sang color brown nga Toyota Innova sa taytay. Sunod niya nga nakit-an ang duha ka mga lalaki nga nag gwa sa salakyan kag naghulog sang sako nga iya gindumdom may unod nga basura.
Plano sang PNP nga mag request sang DNA test para sa mga bangkay.