Sa video makita nga halos magsulod na sa mga baligyaan sa downtown area sang Bacolod City ang tubig. Halos malab-ot na sang baha ang mga baligya sang mga sidewalk vendors sa downtown.
Ini ang nangin sitwasyon matapos ang kapin sa isa ka oras nga pagbubo sang ulan Martes sang hapon.
Ginbaha man sa gihapon ang dalan sa Reclamation Area sa gwa sang SM City Bacolod.
Ginatudlo nga rason sa pagbaha halin sa Reclamation Area amo ang sirado nga mga guluwaan sang tubig sang diverson channel sa lugar.
Ginsiling ni City Administrator Atty. Mark Steven Mayo, nga automatic na dapat nga magabukas ang guluwaan sang tubig sang diversion channel kun magtaas ang lebel sang tubig, apang sang kahapon wala ini magbukas.
Ginapangayuan na sang siudad sang paathag ang Department of Public Works and Highways may angut sa amo nga failure sang diversion channel.
Dugang pa niya, sang ginbuksan na sang siudad ang mga sirado nga guluwaan sang tubig, madasig man nga nagtahaw ang baha sa palibot.
Magluwas diri, ginbaha man ang Barangay 3 kag 12, kag ang pila ka mga porsyon sang dalan Lacson kag Magsaysay.
Sandig sa record sang City Disaster Risk Reduction and Management Office, hasta tuhod ang pinakamadalum nga baha nga na-record kahapon.
Wala man sang may gin-evacuate bangud sa pagbaha.
[sibwp_form id=1]