Provincial Health Office naka record sang siyam ka napatay bangud sang suspected rabies kag isa naman ka kumpirmado nga patay bangud sang rabies as of October 3. 2022.
Maka-alarma ang amo nga sitwasyon suno sa PHO.
Suno kay Rafael Marmolejo, III ang Rabies Coordinator sang PHO ang pinaka ulihi nga suspected case sang rabies amo ang anum ka tuig nga bata gikan sa San Carlos City.
Tuman ang pagsaka sang human rabies death.
Sang 2021 apat ang human rabies death nga na-record. Suno kay Marmolejo, ulihi na nagdangup sa duktor ukon sa mga animal bite center ang mga natungdan. Nakitaan na sila sang sintoma kasubong sang hydrophobia ukon fear of water kag aerophobia ukon fear of fresh air gani ulihi na ang tanan.
Abiso ni Marmolejo nga sa tion nga ma kagat sang ido ukon ano man nga sapat, dapat gilayon nga hugasan ini sa running water kag habunan, kag mag padulong sa animal bite center ukon magbisita sa duktor.
Paathag ni Marmolejo, ang confirmatory test lamang gikan sa Research Institute for Tropical Medicine ang maka kumpirma sang rabies case.
Ginakabig naman nga rabies case kun ang natungdan nakagtan gid man sang ido ukon sang sapat kag ang persona nakitaan sang sintoma – ayhan hydrophobia ukon aerophobia.
Samtang, suno kay Marmolejo, kun may pagsaka man sa kaso sang rabies, isa sa gina lantaw amo ang manubo nga bakuna sa mga ido nga mahimo epekto man sang pandemic. Gina recommend ang pag convene karon sang rabies council.