PENRO gina-evaluate ang sitwasyon sang natalupangdan nga bat colony sang mga ginakabig endangered specie sa Barangay 30 sa Bacolod.
Nag-gwa sa pagpang-usisa sang katapo sang DENR-CENRO Bago, nga isa ka bat colony sang golden crowned flying foxes ang natalupangdan nga nagapanong sa puno sang lunok sa Purok Paglaum sa Barangay 30 sa Bacolod.
Natukiban nga tinuig na nga nagatinir sa lugar ang mga cabug bangud napalibutan ini sang mga fruit trees kasubong sang tar apple, paho kag iban pa.
Ginsiling ni Provincial Environment and Natural Resources Officer Joan Gerangaya nga ginakabig endangered specie ang mga flying foxes nga kasubong nga makit-an sa Mambukal Resort and Wildlife Sanctuary sa banwa sang Murcia.
Gani makabig nga pinasahi ang ila pagtinir sa Bacolod nga isa ka highly urbanized city. Gani karon gina-evaluate na sang Department of Environment and Natural Resources ang sitwasyon sang bat colony ilabi na nga yara sa bakante nga compound ang ila gina-istaran nga ginapalibutan sang pamalay.
Plano sang ahensya nga masugilanon ang tag-iya sang propiedad agud nga matagaan sang tini-on ang bat colony antes pa man ang posible pag-develop sang lugar kag ang pag pautod sang kahoy para sa ginapaabot nga construction projects.