Gindeklarar nga dead on arrival sa clinic ang lalaki nga nabungguan sang canter sa national highway nga sakup sang Sitio Pahilanga, Barangay Miranda sa banwa sang Hinigaran Domingo sang kaagahon.
Suno kay Lt. Col. Eduardo Corpuz, hepe sang Hinigaran PNP, nakatabok na sa dalan ang 36-anyos nga pedestrian apang siya ang nagbalik kag nabungguan sang canter nga ginamaneho sang 51-anyos nga driver.
Padulong Hinigaran ang canter kag magadeliver kuntani sang isda. Suno sa driver, iya gintinguhaan nga likawan ang biktima apang gulpi lang ini nagbalik.
Taga Barangay Santol sa Binalbagan, ang biktima kag temporaryo nga naga-istar sa Hinigaran.
Suno kay Corpuz, madulom ang lugar nga natabuan sang insidente bangud wala diri sang street lights.
Makabig nga accident-prone ang highway halin sa boundary sang Hinigaran kag Pontevedra sa Brgy. Miranda padulong Gargato, bangud nga 4-lanes ang dalan kag wala pa sang masanag nga street lights sa lugar.
Dugang pa ni Corpuz nga nag-request na ang local government unit sang Hinigaran kag ang kapulisan nga mabutangan sang solar street lights ang madulom nga highway sang banwa.