Sa programa, ginklaro ni President Ferdinand Marcos Jr. nga ang Presidential Scholarsip program ang gin-obra sang gobyerno agud mahatagan sang bulig ang mga graduating kag working students nga may kabudlayan ila pag-eskwela.
Ini ang unod sang iya mensahe, matapos siya nga personal nga nanagtag sang tig-20,000 pesos nga financial assistance para sa mga pili nga estudyante sa idalum sang Presidential Scholarship Program sa Dumaguete City, Negros Oriental.
Sa isa ka turn-over ceremony Lunes sang aga, 250 ka mga scholars gikan sa Dumaguete City, Valencia, kag Bacong, ang nakabaton sang amo nga bulig gikan sa gobyerno nasyonal.
Suno sa Presidente, tuyo sang amo nga programa ang buligan ang mga estudyante nga ginakulang sa mga balayran sa eskwelahan.
Ini ang kabahin man sang tig 200,000 pesos nga ginpanghatag sang gobyerno paagi sa Local Government Support Fund ukon LGSF sa tagsa ka mga Barangay sa bug-os nga Pilipinas.
Ang Barangay ang mapili sang 5 ka mga scholars nga makabaton sang tag 20,000 pesos. Samtang ang nabilin naman nga 100,000 pesos ang sarang nila magasto para sa ila mga proyekto.
Sa Negros Occidental, nangin kontrobersyal ang ini nga programa matapos nga ginareklamo ang pila ka mga barangay kapitan nga ila mismo mga himata ang nakasulod bilang Presidential Scholars.
Kadungan sini ginpangunahan man sang Presidente ang pag distribute sang napulo ka kilo nga bugas sa 2,230 ka mga benepisyaryo sa Negros Oriental sa idalum sang Bawat Bayan Makikinabang Program.
Sandig sa record sang probinsya, may 386,673 ka mga pamilya ang makabaton sang amo nga bugas.
Nagpasiguro man ang presidente nga kada duha ka bulan, may paalabuton nga 10 ka kilo nga bugas ang mga kwalipakido nga benepesyaryo.
[sibwp_form id=1]