Isa ka bangkay sang bata nga babaye ang nasapwan kagapon sang hapon sa suba sang Barangay Canmoros sa banwa sang Binalbagan.
Wala na sang bayo ang menor de edad kag underwear na lamang ang nabilin. Nakasuksok sang gold nga aritos ang bata.
Gindala ang bangkay sa La Funeraria Soledad sa Brgy. Enclaro sa Binalbagan.
Kagab-i, positibo nga gin-identify sang iya amay ang biktima, paagi sa aritos sini.
Ang bata nga babaye naga-edad 8-anyos kag residente sang Brgy. Inolingan sa Moises Padilla.
Ang 8-anyos nga bata amo ang isa sa walo ka miyembro sang pamilya Arsaga-Muncal-Mayoral nga naanod sang baha sa Hacienda Mapait, Brgy. Inolingan sadtong naglaslas si Bagyo Tino, tatlo ka semana na ang nagligad.
Sa karon, ginlubong na sa patyo sa Moises Padilla ang bangkay sang bata.*