Redistring ukon pagtunga sa Bacolod sa 2 ka distrito iduso liwat sang konseho.
Sa 12th Council sang Sangguniang Panlungsod sang Bacolod tuyo ni Councilor Al Victor Espino nga liwat nga maduso ang resolution nga magasuporta sa redistricting plan ukon ang pagtunga sang Bacolod sa duha ka mga congressional district.
Malawig naman nga wala matigayon ang naduso nga hagna sa kongreso.
Gani ginapaabot ni Espino nga matagaan na ini sang kasanagan paagi kay Congressman Albee Benitez nga naga-suporta sa redistricting plan.
Pareho nga nagapati sanday Espino kag Benitez nga dako nga bulig sa ekonomiya kun separado nga mapainan sang pondo ang duha ka mga ginalauman nga congressional district sa siudad.
Sa madasun nga sinemana natalana nga magatambong ang kongresista sa session sang konseho para sa iya inaugural speech.
Sa pihak nga bahin ginpahayag ni Espino nga nagaserbe pamuno sang Committee on Education sang konseho nga tinguhaan nila nga mapadasig ang panibag-o nga proseso sa idalom sang Government Procurement Policy Board para sunod nga matigayon ang bidding para sa pagbakal sang kapin P29M nga balor sang libre nga mga school supplies nga ipanagtag sa masobra 72,000 ka mga public elementary kag high school students sa siudad.