Temporaryo nga ginpauntat sang probinsya ang naka schedule nga pagbakuna para sa mga yara sa A4 category sa Negros Residences sini nga adlaw.
Suno kay Atty Rayfrando Diaz ang provincial administrator, kasunod sang glitch sa masterlist ginpakamaayo sang probinsya paagi sa Provincial Health Office nga i-postpone anay ang pagbakuna.
Paathag ni Dr Ernell Tumimbang, may kinahanglan sila nga i-reconcile sa AstraZeneca vaccines nga ginbakal sang probinsya kag sa listahan sang dapat mabakunahan. Iga-schedule man sini nga semana ang napostpone nga vaccination suno kay Tumimbang.
Naghinyo naman sang pasaylo si Diaz sa mga nagpila kag nahuol, kag ginapasalig nga maga pahibalo ang probinsya sa mga natungdan sa tion nga patigayunon na ang vaccination. 750 ang naka schedule nga bakunahan kuntani subong nga adlaw sa ika duha nga batch sang yara sa A4 category.
Samtang, natalana naman ang pag rollout sang 50,000 ka Sinovac vaccine sang probinsya nga nag abot sang Sabado. 96 percent naman sa 70,000 ka dose sang Janssen vaccine ang na utilize ukon nagamit suno kay Tumimbang.
“Ginatan-aw namon anay ang number sang vaccines nga ara sa amon kay daw indi kami mag tally sa numbers. Te kun amo na kadamo, basi naga papila kami kag wala kami sang ihatag. So kinahanglan nga i-revisit namon ang number of vaccines nga remaining sa amon, kag sa amon nga list not for anything else. Madayon na siya. It’s a matter of inconvenience lang sa aton nga time subong. But definitely within the week dayunon na siya namon,” suno kay Tumimbang.