Nag huy-huy ang abaga kag nagpangalot na lang sang iya nga ulo si Bricks Panganiban sang makita ang sitwasyon sang iya nga van nga gina pa rentahan.
Wala na ang mga pulungkaun sa sulod kag naga nilapta lang ang higko sang baka sa sulod.
Sa iya gin renta ang van nga gin kargahan sang kinawatan nga baka nga naabtan sang mga pulis kaina sang kaagahon sa Don Salvador Benedicto.
Si Clyde Ersida ang nag renta sang van kay gamiton kuno sang iya tiya sa pag libot libot sa Negros.
Nakig sugilanon siya sa mga pulis kaina sang aga kag nag klaro sang iya nga ngalan.
Gin aresto sang Don Salvador Benedicto PNP sanday Jerry Genelaso, ang naga driver sang van, si Clyde Ersida nga amo ang nag renta sang van kag ang 23 anyos nga si Rollie Francisco.
Wala niya mapunggan nga kadtuon sa detention cell ang tatlo para masugilanon.
Naabtan niya ang isa ka taga San Carlos cCity nga nadulaan man sang baka nga naga pautwas sang kainit sa tatlo.
Matapos ang ginkawatan sang baka, siya naman nag bulos.
Suno sa DSB PNP indi ini ang una nga ti-un nga may nag report sa ila nga hinali na lang nag missing ang ila nga baka.
Suno sa deputy chief sang DSN PNP nga si Lt. Everly Canto, nalabyan nila nga naga parking ang van sa higad sang dalan pero naga andar, nag duda na sila.
Nakuhaan sang driver sang van nga si Genelaso sang pusil kag mga bala kag si Ersida naman nakuhaan sang duha ka sachet sang shabu.
Suspetso sang pulis, sila man ang sa likod sang serye sang kinawatay sang baka sa lugar
Naga samo ang kainit kag kalipay ni Jessa Pedrosa. Iya ang baka nga naabtan sang pulis.
Ang iya hinablos nga si Lily Rose, ginkawatan man sang baka sang Nobyembre sang nagligad nga tuig.
May walo na tanan ka mga missing nga baka nga na report sa DSB PNP. Ipasaka ang kaso nga cattle rustling batuk sa tatlo. Illegal possesion of firearms nga kaso sa driver kag possession of illegal drugs sa kay Ersida. Wala na sila nag hatag sang pahayag.
Ang van kag ang baka nga palangabuhian sang mga biktima ang maga pabilin anay sa kustodiya sang PNP.