Pagbukas sang provincial borders ang mahimo isa sa mga importante nga talakayon sa natalana nga Provincial Disaster Council meeting sa Biernes.
Padayon man nga sirado ang border sang Negros Occidental kag Oriental pero may pila na ka bulan nga nag bukas sang border sini ang San Carlos City sa Vallehermoso sa Negros Oriental kag gina paabot man ang pag bukas sang border sang Kabankalan sa Mabinay, Negros Oriental.
Suno kay Atty Rayfrando Diaz ang provincial administrator, mahimo nga amat amat na nga gina batyag ang fatigue ukon ang kakapoy tuga sang pandemya.
Amat-amat naman ang pagbukas sang mga border sa iban nga kaiping nga probinsya kag siudad.
Ugaling suno kay Diaz, may kabalaka sa gihapon gikan sa pila ka mga grupo sang duktor angut sa pag halog sa mga border control ilabi na nga indi pa man hilway ang tanan kontra sa COVID-19.
Suno kay Diaz nanaog man sa 70 ang active COVID-19 cases sang Negros Occidental pero, ang Oriental masobra sa gihapon sa isa ka gatos, kag mataas man gani sa gihapon ang active COVID-19 cases sang kaiping sini nga probinsya ang Cebu.
Madamo sang dapat hatagan sang konsiderasyon bagay nga mahimo mangin talakayan ini sa Biernes kaupod ang mga alkalde sang probinsya.
Kun maghilisugot gid man nga buksan na ang border ginapaabot ang executive order para sa katumanan sini.