Face to face classes sa mga buluthuan ang mahimo na magbalik sa bulan sang Pebrero sa madason nga tuig.
Suno kay Bacolod Councilor Renecito Novero, ginmanduan siya ni Bacolod Mayor Evelio Leonardia nga magsapul sa DepEd para mapat-ud ang ini nga plano agud makahimo sang nagakaigo nga tikang ang siudad may angut sa mga buluthuan nga ginahimo sa karon nga quarantine facilities.
Ginpahayag ni Novero nga indi pa man pat-od suno sa DepEd ang plano nga pagbalik sang face to face classes bangud nagakinahanglan pa ini sang pahanugot sang presidente.
Kun matigayon gid man nga magbalik na ang mga klase sa mga buluthuan, pagagamiton na ang classrooms nga ginconvert sang siudad bilang quarantine facilities.
Pero may alternatibo na nga tikang ang siudad sa ti-on ng bawi-on gid man sang DepEd ang mga classrooms.
Samtang, tubtub sa sini nga semana na lamang ang klase sa mga pampubliko nga eskwelahan kag magasugod na ang ila Christmas break.