Pag-operate sang mga tenants sang Manokan Country ang posible pa maglawig sa Disyembre. Sini nga Setyembre ginalauman sang Bacolod LGU ang amat amat nga pag transfer sang mga tenants sang Manokan sa temporaryo nga baligyaan parking area sang SM city Bacolod.
Pero ginpahayag ni Mayor Albee Benitez nga sa karon naga-depende sa time table sang SM Primeholdings Incorporated ang pagtapos sang ulubrahon sa ila salayluhan nga baligyaan.
Wala sang nakita nga problema ang alkalde bisan malawigan pa ang pag transfer sang mga tenants ilabi na nga nagahilapit ang masskara festival kag bisan asta sa bulan sang Disyembre.
Ang SMPHI amo ang maga develop sang Manokan Country nga nalakip sa ila gin-arkilahan nga 3-hectare property sang Bacolod Lgu sa reclamation area.
Ini ang ginalauman mas magahatag sang dugang nga atraksyon kag magapalambo sang ekonomiya sang siudad sa palaabuton.