P5B nga dugang nga pondo kag pagtukod sang program management structure kabahin sa mga amendment nga gintalakay sa public hearing angut sa pagligwat sang Sugar Industry Development Act ukon ang SIDA.
Sa joint position paper sang katapo sang Confederation of Sugar Producers Association, National Federation of Sugarcane Planters, Panay Federation of Sugarcane Farmers kag Philippine Sugar Millers Association ila ginduso sa katapo sang Congressional Committee on Agriculture and Food nga mapasaka sa P5B ang italana nga pondo para sa SIDA halin sa P2B.
Ini agud mas mapasaka ang naganubo nga sugar production sang pungsod paagi sa farm productivity improvement, mill efficiency improvement kag dugang nga farm to market infrastructure projects.
Ginpabutyag sang sugar producers kag millers organization nga nagakadapat may yara sang program management structure ang Sugar Regulatory Administration nga permanente nga magatutok sa pagpatuman sang SIDA mandated programs kag ang pag-institutionalize sang Stakeholders Consultative Assembly and Sugar Industry Development Council.
Ginsiling ni Congressman Mark Enverga, chairman sang congressional committee on Agriculture and Food nga isa ka pagpanghangkat ang ginaduso nga budget increase pero nagalaum siya nga mapatpat sa public hearing ang mga nagakaigo nga solusyon agud makumbinsi ang Department of Budget and Management sa tuyo nga mabuligan ang katapo sang industriya.
Naduso man sa public hearing ang pag-audit sa utilization sang SIDA allocation kag ang pagpahapos sang requirements para sa mga sguar farmers sa ila application para sa financial assistance kag benefits sa idalom sang laye.
Ang public hearing ang gintambungan sang mga kongresista gikan sa Negros Island Region kag pamunuan sang nagkalain-lain nga ahensya sang gobyerno.