P15M access road project nga maga-angut sa IV Ferrer kag Carlos Hilado Highway sa Barangay Villamonte ginapaabot maagyan sa madasun nga bulan.
Curing period na lang ang ginahulat kag sarang na maagyan sang mga motorista ang bag-o kaayo nga dalan nga maga-angut sang IV Ferrer Avenue kag Carlos Hilado Highway ukon Circumferential road sa Barangay Villamonte.
Gani kun gikan ka sa CL Montelibano Drive pwede ka na makaliko sa Narra extension road pakadto sa IV Ferrer Avenue lapos sa Circumferential road sa Homesite area.
Ginsiling ni City Engineer’s Office OIC Engr. Loben Ceballos, dako ang mabulig sang access road nga ginapaabot mabuksan sa mga motorista sa Nobyembre.
May P15M ang ginpain nga pondo para sa road kag box culvert project.
Kabahin ini sa mga road and drainage project nga napondohan sa idalom sang loan agreement.
Nalakip diri ang dalan pakadto sa Sanitary landfill sa Barangay Felisa kag ang Cabug-Handumanan Road project nga ginapaabot matapos sa Pebrero.