Mahimo na subong tanan nga mga pumuluyo sang Bacolod nga makapa register sa ila tagsa ka mga barangay ukon online para mahatagan sang prayoridad sa pagbakuna kontra Covid-19.
Ginpahayag ni Bacolod Emergency Operations Center executive director Em Ang nga bisan ang mga senior citizens, mga may co-morbidities kag medical frontliners pa lamang karon ang ginabakunahan, kinahanglan nga magparehistro na ang iban nga mga pumuluyo agud nga mahatagan sila sang prayoridad kun may available na nga supply sang bakuna.
May ginapaabot nga dugang nga bakuna ang siudad sini nga bulan sang mayo gikan sa Department of Health pero wala pa mahibaluan kun pila ini kabilog.
Ginapaabot man nga sa bulan sang hulyo magaabot na ang AstraZeneca vaccines nga ginbakal sang siudad kag ini ang pagagamiton sa mass vaccination.
Sa karon, nagadepende anay ang siudad sa supply sang bakuna nga mahatag sa ila sang DOH regional office.