Tigayon na nga naka submit ang Bacolod City sang purchase order sini para sa iga baligya nga 20 pesos per kilo nga bugas.
Suno sa Department of Agriculture notice na lamang ang gina hulat gikan sa Food Terminal Incorporated kag matigayon na ang baligyaanay nga target sini nga semana.
Ginsiling ni Engr Jose Albert Barrogo ang Agriculture Regional Director nga yadto man karon sa Manila, nga maga pakig-angut siya sa FTI bangud ila na lamang nga sabat ang gina hulat.
Kun may notice na sarang nga makakuha na sang bugas gikan sa National Food Authority para masugdan na ang baligyaanay. 5,880 sacks ang tuyo nga ibaligya sang Bacolod City.
Suno kay Barrogo, may nagakaigo man nga supply para sa Negros Occidental kag pagakuhaon lamang ang stocks gikan sa Iloilo nga warehouse.
Ginahitso pa sa karon ang para sa Negros Occidental kag na forward naman sa central office ang proposal sang probinsya nga i-tap ang federation sang mga asosasyon sang irrigators angut man sa pag baligya sang 20 pesos kada kilo nga bugas.
Ini nga bagay suno kay Barrogo ang initiative na sang probinsya.
“Ari ko diri sa Manila isa na sa mga agenda ko nga i-follow-up ang FTI. So once nga maka issue sang notice sa NFA amo na dayon pwede na ta dayon maka kuha stocks sa NFA, kag pwede na dayon si Bacolod maka execute na”, suno kay Barrogo.