Isa ka lalaki nga nagapakuno-kuno nga isa ka police major ang gindakup sa entrapment operation sang mga matu-od tuod nga pulis sang Bacolod City Police Office sa gwa sang isa ka hotel sa Goldenfields Commercial Complex sa Barangay Singcang-Airport sa Bacolod City sadtong Sabado.
Gin-alegar nagapakilala bilang si “Police Major Calsado” ang 38-anyos nga suspek nga si alyas “John”, taga Morales, Koronadal City sa South Cotabato.
Gin-aresto ang suspek may angut sa kaso nga 16 counts of robbery extortion nga naglab-ot sa P700,000 kag usurpation of authority bangud nagapakilala ini nga pulis.
Nakuha sa iya ang P3,000 nga kwarta, 18 ka panid sang tig-P1,000 nga boodle money, isa ka cellphone kag salakyan.
Suno sa PNP, ila ginpatigayon ang entrapment matapos makabaton sang madamo nga reklamo angut sa pagpangilkil sang suspek kabaylo nga indi pag ibuy-bust ang iya nga mga biktima.*