Personal nga ginkadtuan ni Bacolod City Administrator Atty. Mark Steven Mayo ang apat ka mga vendors nga wala sa gihapon naghalin sa South Capitol Road, apisar nga makapila na sila ka beses nga ginapahalin sang City Legal Office Enforcement Team.
Sa profiling sang siudad, isa sa ila ang taga Barangay 9, samtang isa man ang taga Vista Alegre kag duha ang taga relocation site sa Abada Escay.
Ginsiling ni Mayo nga ila na liwat nga ginpaathag sa mga natungdan nga sandig sa ordinansa sang siudad, wala madala sa pwede ma baligyaan ang amo nga dalan.
Ginalantaw man sang siudad ang posibilidad nga masaylo sila sa North Capitol Road agud mahatagan sila sang special permit.
Isa man sa gina propose sang mga natungdan amo ang pagbutang sa ila sa porsyon sang isa ka forest park sa South Capitol road nga indi na sakop sang dalan.
Apang suno kay Mayo, depende pa ini kun magsugot ang tagdumalahan sang amo nga forest park.
Dugang ni Mayo, isa pa gid sa ginalantaw solusyon amo ang pag-amend sang existing nga vending ordinance, agud malakip na ang South Capitol Road sa vending areas.
Tubtob sa karun, nagapabilin pa nga yara sa South Capitol Road ang mga vendors matapos nga nagpamalibad ini nga maghalin samtang wala pa sila sang saylohan.
[sibwp_form id=1]