Incentive para sa mga senior citizen nga maga pabakuna ang igatanyag sang Negros Occidental para mas mapaayo pa gid ang vaccination program sa ila.
Manubo ang resulta sang ikaapat nga National Vaccination Days ilabi na ang para sa senior citizens, nga gin-extend na tubtob sa Biyernes.
Sa Negros Occidental, sa March 13 nga report sang DOH, 55.28 percent pa lang sa target sa A2 category ukon senior citizens ang fully vaccinated.
Suno kay Provincial Administrator Rayfrando Diaz, wala labot nga tuyo nila nga patigayunon na ang house to house vaccination, tanyagan sang dugang nga membership sa Negros Occidental Comprehensive Health Program ukon NOCHP ang mga maga pabakuna nga mag-asawa nga senior citizen.
Sa karon, head of the family ang katapo sang NOCHP. Paathag ni Diaz, tubtob nga indi malab-ot ang target nga mabakunahan para sa senior citizen ukon ang gikan sa vulnerable sector, indi mag idog ang probinsya sa Alert Level 1 kag magapabilin ini sa Alert Level 2.