Nabalaka ang pila ka mga residente sang Purok Kawayanan sa Barangay Vista Alegre sang maguba ang sementado nga dalan nga naga-angut sa overflow tuga sang pagbaha sang nagligad nga Sabado.
Temporaryo man nga indi maagyan ang dalan. Gani ang pila ka mga motorista ang naga-detour na lamang.
Tungod man sang peligro nga sarang matuga sa mga nagapasimpalad nga mag-agi sa overflow, nadesisyunan sang mga pumuluyo nga sila na mismo ang magkaayo sang naguba nga dalan.
Pila sa ila nagtipon sang balas sa kilid sang malapit nga suba. Ang iban naghatag kag nagkolekta man sang donasyon para ipang bakal sang semento. Pati mga magagmay nga kabataan ang nanghakot sang bato para makaayo ang dalan. Ang barangay ang nag-donate man sang sinako nga semento nga amo ang gin-gamit sang mga residente sa pagtukod sang temporaryo nga alagyan.
Malapit isa ka semana sila nga nagbinuligay tubtob nga liwat nga naagyan sang mga motorista ang naguba nga dalan.
Ang overflow amo ang alagyan nga naga-angut sa Barangay Vista Alegre sa Abada Escay relocation site sa Barangay Granada.
Importante para sa mga pumuluyo ang alagyan amo nga ginakalipay man nila ang nangin bunga sang ila paghugpong kag pagpangabudlay sang makita nga hilway na nga nagalinabay ang mga motorsiklo, tricycle kag iban pa nga nagatabok sa suba.