Nag dinasok sa sini nga tricycle ang mga estdyante para lang maka lab-ot sa eskwelahan. Las siyete y medya na pero wala pa sila sa gihapon maka sakay sa jeep.
Amo man ang iban nga mga empleyado kag negosyante. Malawig lawig ang hultanay para maka sakay. Ang ini nga mga estudyante las sais y medya pa lang naghulat sang jeep, pasad na las siyete wala pa sa gihapon sang may masakyan.
Ang negosyante naman nga si Goria Castillano, masobra na sa treinta minutos nga nga naga hulat. Naga baligya siya sang pagkaon sa plaza sang Bacolod. Ang oras niya nga ginhulat awat pa kun tani para maka baligya kag maka ginansya.
Amo man sini sa gihapon ang eksena sa may highway sang Barangay Mansilingan. Ang kinalain lang subong nga aga kay pati ang sa tabok sang dalan may naga bantay pa gid sang jeep.
Samtang naga hulat ang mga pasahero sa dalan, ang iban sa mga drayber sang depasahe nga jeep aga pa ara na sa bacolod city government center para magpangayo sang bulig sa mga opsiyal.
Nahadlok sila mag biyahe kay basi mamultahan sang 120,000 pesos. Luyag nila nga ma release ang ila nga prangkisa. Pati ang ila pamilya apektado man sang kulang nga depasahe nga salakyan sa dalan.
Sa idalom sang PUJ Modernization Program ni anay presidente Rodrigo Duterte tuyo sang programa nga i phase out ang mga depasahe nga salakyan nga kinse anyos pasaka na. Ang modern jeepneys ang ibulos. Kahapon gin suguran na sang lto ang pagpanakop sang mga PUJ, taxi kag tricycle nga wala sang prangkisa kag permit.
Sa Bacolod may 123 ka mga modernized jeepneys na nga naga biyahe. Sa record sang LTFRB, may masobra sa isa ka libo na lang ka mga traditional jeepneys ang wala pa nag expire ang prangkisa. Masobra sa tres mil ang expired na. Kutob sa mga kinse na ka tuig nga mga salakyan ang indi na maka renew sang ila prangkisa sa idalom sang puj modernization program.