Kutob lang sa mga kiosko nga nag-extend sa pagbaligya sa October 31 ang maka-redeem sang food vouchers halin sa donasyon ni Mayor Albee Benitez.
Gina-require sang Bacolod LGU ang mga kiosk renters nga nagpadayon baligya sa MassKara Festival asta Oktubre 31 nga magkuha sang certification sa Bacolod Yuhum Foundation antes pa man nila mapakambyohan ang mga food vouchers.
Ini agud makasiguro nga nag-operate sila sang ginpalawig sang alkalde ang tuigan nga festival.
Ginklaro ni Special Assistant to the Mayor Mae Cuaycong nga ang gingamit nga P2.5M nga balor sang food vouchers ang gikan sa personal nga donasyon sang alkalde.
Gani maga depende na sa alkalde kun ano ang iya himuon sa mabilin nga pondo nga iya gintalana agud mabuligan ang mga naga-renta sang kiosko sa tinalikdan nga epekto sang Bagyo Kristine kag tig-ululan.
Sa 12,500 nga food vouchers nga naga-balor P200 kada isa, may masobra sa 11,200 ang kabilugan nga na-claim sa mga kiosko sa Bacolod Public Plaza, The Upper East kag Bacolod City Government Center.
Kaina isa-isa nga gin-scan sang katapo sang Management Information Technology and Computer Services ukon MITCS ang mga gin-endorse nga food vouchers sang mga kiosk renters.
Ini agud masiguro nga wala ginpeke ang mga QR coded vouchers.