Amat-amat naman sa karon balik sa normal ang sitwasyon sa Canlaon City kasunod sang kahalitan nga natuga sang Bagyo Tino, pero suno sa gobernador, sarang nga mga isa ka tuig pa kag maka recover ang siudad.
Ginsiling ni Negros Oriental Governor, Chaco Sagarbarria nga gilayon ginpadala sang probinsya ang mga heavy equipment sini sa Canlaon City kasunod sang pag igo sang bagyo Tino sadtong Nobyembre 4.
Ginabulubanta P5 tubtob P10 million ang balor sang kahalitan sa agrikulutura sang siudad dala sang flashflood.
Ang Canlaon naga supply sang mga high value crops indi lamang sa Negros Oriental kundi pati na sa Negros Occidental.
Suno kay Sagarbarria, maga hinyo sila sang bulig sa Department of Agriculuture para maka tanom liwat kag makatibawas ang mangunguma.
20 ang nautas nga kabuhi sa Canlaon City sang maglaslas ang bagyo Tino.
Yara sa Bacolod City sang Hwebes si Sagarbarria para sa Regional Development Counci kun sa diin siya ang Regional Chairperson.*