Mga empleyado sang isa ka delivery service company sa Bacolod ang nagreklamo sang illegal deduction nga nagakatabo sa ila nga sweldo.
Sa press conference nga ginsakdag sang pila ka mga empleyado ila ginsiling nga sa pila na kabulan ginabuhin sa ila nga sweldo ang mga nagakadula nga parcel.
Suno sa supervisor sang distribution center sang J and T Express nga si June Mike Fernandez sila ang nagfile na sang reklamo sa Department of Labor and Employment bangud sang gina alegar illegal deduction. May ginapaabot na nga inspection nga patigayunon.
Kun ano man ang kantidad sang madula nga parcel ang gina bahin bahin sa mga 60 ka mga empleyado kag ini ang gina buhin sa ila nga sweldo.
Suno sa sorter nga si Joash Gucaban ang masubo kay halos kadam-an sa ila minimum wage earner kag buhinan pa sila sang kantidad nga wala man sila sang kasal-anan para magpanabat diri.
Doble ang kabug-at sa ila nga bahin kay gina paigo na man lamang nila kuntani ang sila sweldo sa mga kinahanglanon.
Dugang pa niya indi na nila mapat-od ang kantidad nga ginbuhin bangud wala man sila regular nga ginahatagan sang pay slip.
Dng mga alegasyon ang gin kumpirmar man sang anay warehouse manager nga si Albert Reyes. Suno kay Reyes napahalin siya sa kumpanya bangud sang iya nga pagpakigbato sa interes sang iya nga mga kaupod.
As of press time ginahulat pa sang DIGICAST sang sabat sang J and T Express.
Suno kay Ann Tiongco padayon pa nila nga ginatipon ang impormasyon agudto ila man masabat sang tul-id ang alegasyon batuk sa kumpanya.
Ang indi pagbayad sang overtime pay, night differential pay kag wala sang insurance ang ginareklamo man.