Ginhatagan sang posthumous Philippine National Police Heroism Medal ukon Medalya ng Kadakilaan si Police Senior Master Sgt. Rommel Aguilar, nga ginpatay sang katapo sang New People’s Army sa banwa sang Calatrava, sadtong Disyembre 7.
Ang Medalya ng Kadakilaan amo ang pinakamataas nga award nga sarang mahatag sang police regional director sa isa ka pulis.
Si Police Brigadier General Arnold Thomas Ibay, pamuno sang Police Regional Office-Negros Island Region ang naghatag sang medalya sa iya pagbisita sa haya ni Aguilar sa iya puluy-an sa Toboso sang Miyerkules.
Ginkilala sang PRO-NIR ang pag-serbisyo, kaisog kag debosyon sa duty sang 45-anyos nga si Aguilar.
Naghatag man sang bulig pinansyal si Ibay sa nalisdan nga pamilya ni Aguilar.
Nasapwan nga patay si Aguilar sa Barangay Laga-an, Calatrava, pila ka oras matapos ang pagbayluhanay sang lupok sa tunga sang mga armado nga kalalakinhan sa Barangay Menchaca, Calatrava, samtang maga-serbe kuntani sila sang arrest warrant sa isa ka wanted nga persona.
Antes sini, may gintiro-patay nga isa ka sibilyan ang NPA sa Barangay Dolis, Calatrava. Gin-alegar sang mga rebelde nga asset ang sibilyan sang Army.*