Metro Bacolod Chamber of Commerce and Industry ang nagpabutyag sang kahangawa sa mga nagaluntad nga insidente sang pagpangluthang sa siudad.
Suno sa chief executive officer sang MBCCI nga si Frank Carbon, indi sila kuntento sa ginapahayag sang PNP nga isolated incident lang ang mga nagkalatabo nga pagpaniru sa bacolod humalin sang nagliligad nga mga semana.
Ginpahayag ni Carbon nga luyag nila nga padalman pa gid sang pnp ang imbestigasyon sang mga kaso bangud mahimo may iban pa gid ini nga kabangdanan nga maka apekto sa komunidad.
Bukas ang MBCCI sa pagbulig sa PNP para mapaiway ang pagluntad sang iban pa gid nga mga krimen.
Ginahinyo man nila ang PNP nga magpatigayon sang police visibility ilabi na sa mga inoras kag sa mga lugar kun sa diin masami nagaluntad ang krimen.
Handa man sila nga maghatag sang fuel allowance sa mga motorsiklo kag patrol car sang pulis para maka roving sila sa siudad.