Grupo sang mga negosyante sa Bacolod City ang magahinyo sa lokal nga pangulohan nga i-lift na ang night curfew kag liquor ban sa siudad.
Suno sa Chief Executive Officer sang Metro Bacolod Chamber of Commerce and Industry nga si Frank Carbon, nagadihon na karon sang isa ka position paper ang ila grupo para ihatag sa kay Mayor Evelio Leonardia.
Nalakip sa amo nga position paper amo ang pagdula sang night curfew nga ginapatuman karon humalin las onse sang gab-i tubtub las kwatro sang kaagahon.
Ila man iduso ang pagdula sang liquor ban kag ipatuman na lamang ini sa mga naga edad 22 anyos kag panubo.
Ginpahayag ni Carbon nga tinutuyo sini nga madugangan ang ginansya sang mga magagmay nga negosyo ilabi na sa food and beverage business.
Ginakasubo man ni Carbon ang pagbawi ni Presidente Rodrigo Duterte sa desisyon sang Inter Agency Task Force sa pagpahanugot na kuntani sa mga menor de edad nga naga edad 10 tubtub 14 anyos nga makagwa na sa ila balay.
Ini bangud upod sang mga kabataan ang bilog nila nga pamilya kun maglagaw gani dako man ini nga bulig para sa madamo nga mga negosyo.
Pero nahangpan man ni Carbon nga kinahanglan man nga unahon sang gobyerno ang pagpangapin sang ikaayong lawas sang publiko.