Nagapati si Deputy Speaker sang House of Representatives nga si Bacolod City Lone District Representative Alfredo Abelardo Benitez nga mayorya sang mga kongresista sa pungsod Pilipinas, pabor nga i-postpone anay ang Barangay and Sanguniang Kabataan Elections nga natalana sa Nobyembre 2 sini nga tuig.
Ginsiling ni Benitez nga multiple party ang magapasad sang isa ka bill sa House of Representatives agud iduso nga ipostpone anay ang BSK Election.
Sa inisyal nila nga paghinun-anon ni Benitez kaupod ang tanan nga kongresista, 95 porsyento suno sa iya ang luyag ukon pabor sa amo nga inisyatibo.
Sandig sa pagsulundan sang Korte Suprema, agud ma postpone ang election, kinahanglang nga may ara ini sang “justifiable cause” kaangay sang national emergency.
Sa pagtan-aw ni Benitez, ang krisis sa enerheya kag gatong nga ginapangatubang sa karun sang pungsod ang isa ka dako na nga rason agud ma postpone ang pinili-ay.
Nagapati man siya nga dako ang posibilidad nga suportahan sang senado ang pag postpone sang BSK election.
Nagapadayon pa sa karun ang voter’s registration sang Commission on Elections kag natalana ang filing sang certificate of candidacy para sa BSKE sa September 28 tubtob October 5.
Padayon ang pagpanghanda sang COMELEC para sa BSKE sa November 2 sini nga tuig.*
[sibwp_form id=1]